Tanymal aýdymçy Emin Agalarow Azerbaýjanyň paýtagty Bakuwda «Galkynyş» milli at üstündäki oýunlar toparynyň wekilleri bilen duşuşdy. Duşuşyk toparyň Azerbaýjana amala aşyran döredijilik saparynyň çäklerinde guraldy diýip, THP habar berýär.
Emin Agalarow türkmen çapyksuwarlary bilen söhbetdeş bolup, ahalteke bedewleriniň saklanyş şertleri bilen tanyşdy. Aýdymça türkmen toparyny dünýä derejesinde tanadan we halkara meýdançalarda abraýly baýraklary getiren üýtgeşik çykyşlardan käbir bölekler görkezildi.
Emin Agalarow türkmen jigitleriniň görkezýän gaýtalanmaz ussatlygyna we «asman atlarynyň» owadanlygyna tüýs ýürekden haýran galýandygyny aýdyp, şeýle özboluşly medeni mirasy saklap galmagyň ähmiýetini belledi.
Ýatlap geçsek, mart aýynda «Galkynyş» toparynyň artistleri Türkmenistanyň Döwlet sirkiniň we Görogly adyndaky Döwlet atçylyk sirkiniň wekilleri bilen bilelikde Bakuwyň Circus Sea Breeze toplumynda özüniň gyzykly çykyşlaryny görkezdi. Tomaşaçylara ahalteke bedewleriniň üstünde milli jigitlik sungatynyň ajaýyp nusgalary we ýokary derejeli akrobatik çykyşlar, şeýle-de sirkiň beýleki žanrlaryndaky çykyşlar hödürlendi.
