Halk Maslahatynyň Başlygy Gurbanguly Berdimuhamedow 4-nji aprelde Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň ştab-kwartirasyna baryp, Gaznanyň wise-prezidentleri O.Atabaýewanyň we R.Bazarowyň gatnaşmagynda iş maslahatyny geçirdi. Bu barada «Watan» habarlar gepleşiginde habar berildi.
Maslahatyň dowamynda Gaznanyň çagalara kömek bermäge, olaryň saglygyny dikeltmäge, şeýle hem dünýäniň dürli ýurtlaryna ynsanperwerlik kömeklerini ibermäge gönükdirilen häzirki işleri barada maglumat berildi. Gaznanyň serişdeleriniň hasabyna operasiýa edilen çagalar üçin dikeldiş lukmançylyk hyzmatlarynyň ýola goýlandygy bellenildi.
Şeýle hem Hytaýdan tejribeli lukmanlaryň we dostlukly ýurduň lukmançylyk ýokary okuw mekdepleriniň professor mugallymlarynyň Türkmenistana gelmegine görülýän taýýarlyk barada maglumat berildi.
Gurbanguly Berdimuhamedow Gaznanyň haýyr-sahawat işlerini yzygiderli dowam etdirmegiň, şeýle hem bu ugurda halkara hyzmatdaşlygyň netijeliligini ýokarlandyrmagyň zerurdygyny nygtady. Bejerişiň tebigy usullary babatda daşary ýurtly hyzmatdaşlar bilen tejribe alyşmaga we ýurduň şypahanalarynyň işini has-da kämilleşdirmäge aýratyn üns berilmelidir.
Mundan başga-da, Türkmenistanyň M.Garryýew adyndaky Döwlet lukmançylyk uniwersitetinde «Adaty däl lukmançylyk» otagyny açmagyň maksadalaýykdygy bellenildi. Bu ugur boýunça degişli düzümler bilen özara hereket etmegiň möhümdigi nygtaldy.
