Türkmenistanyň Daşky gurşawy goramak ministrligi elguşlary ýurda getirmegiň we ýurduň çäginden daşyna alyp gitmegiň, şeýle hem olary satyn almagyň, satmagyň, çalyşmagyň we sowgat bermegiň tertibini tassyklady. Degişli 32-ö belgili buýruga 2026-njy ýylyň 23-nji fewralynda gol çekildi we Türkmenistanyň Adalat ministrliginiň resmi saýtynda ýerleşdirildi.
Resminama 2021-nji ýylyň 18-nji dekabryndaky «Aw awlamak we aw baýlyklaryny goramak hakynda» Kanuny durmuşa geçirmek maksady bilen kabul edildi. Buýrugyň ýerine ýetirilişine gözegçilik etmek ministriň orunbasaryna tabşyryldy.
Tassyklanan tertip elguşlar bilen bagly ähli amallary — getirmekden we alyp gitmekden başlap, eýelik hukugynyň berilmegine çenli ähli gatnaşyklary düzgünleşdirýär. Elguşlar diýlip, aw awlamagyň barşynda ulanylýan bürgüt, laçyn, ütelgi ýaly ýyrtyjy guşlara düşünilýär.
Bu talaplary berjaý etmek şeýle guşlary saklamak bilen meşgullanýan ähli ýuridik we fiziki şahslar üçin hökmanydyr. Guşlaryň eýeleri olary ygtyýarly edarada we Türkmenistanyň Elguş awçylarynyň milli jemgyýetinde hasaba aldyrmalydyr. Munuň üçin arza bilen ýüz tutulýar we bäş iş gününiň dowamynda hasaba alyş şahadatnamasy resmileşdirilýär.
El guşlary getirmek we ýurduň çäginden alyp gitmek diňe ygtyýarly edara tarapyndan berlen ýörite rugsatnama bolan ýagdaýynda mümkindir. Eger guşuň görnüşi CITES Konwensiýasynyň (Ýabany ösümlik we haýwanat dünýäsiniň ýitip gitmek howpy astyndaky görnüşleriniň halkara söwdasy hakynda Konwensiýa) sanawyna girýän bolsa, onda onuň talaplaryna laýyklykda goşmaça rugsatnama talap edilýär. Türkmenistan bu konwensiýa 2024-nji ýylyň iýulynda goşulypdy.
Rugsatnama almak üçin gyzyklanma bildirýän şahslar erkin görnüşinde ýazylan arzany we degişli resminamalary tabşyrmalydyr.
