Saud Arabystanynda täze “Formula 1” trassasy gurulýar, onuň bir bölegi takmynan 70 metr belentlikden geçer. Er-Riýaddan takmynan 45 kilometr uzaklykda ýerleşýän Qiddiya etrabynda ýerleşýän bu taslama awtosportda giň gerimli taslamalaryň biri hasaplanýar.
Bu aýlawyň esasy aýratynlygy, takmynan 20 gatly jaýyň beýikliginde ýerleşýän birinji öwrümi bolar. Şeýle gurluş düşýän agram, çydamlylyk we howpsuzlyk bilen baglanyşykly çylşyrymly inženerçilik çözgütlerini talap edýär.
Taslamany ýaryş ýolunyň arhitektory Germann Tilke we “Formula 1-iň” öňki sürüjisi Aleks Wurs işläp düzýär. Bu ýolda 21 öwrüm we üç DRS zolagy — sürüjileriň tizligi ýokarlandyrmak üçin aerodinamiki garşylygy azaldyş ulgamyny ulanyp biljek ýerleri bolar. Bu ýolda bolidleriň iň ýokary tizliginiň sagatda takmynan 325 km-e ýetmegine garaşylýar.
Tomaşaçylaryň amatyna aýratyn üns berildi. Standart tribunalaryň ýerine, olar üçin umumy binagärlik toplumyna birikdirilen terrasalar we tomaşa meýdançalary döredildi. Golaýynda güýmenje infrastrukturasyny gurmak meýilleşdirilýär.
Täze awtodrom syýahatçylygy we güýmenje senagatyny ösdürmek strategiýasynyň bir bölegi bolar. Geljekde, gurluşyk işleri tamamlanandan soň (çak bilen 2027-nji ýyldan soň), “Formula 1” ýaryşyny Jiddadan şu ýere geçirmek meýilleşdirilýär.
Bilermenler şeýle taslamalaryň gurluşykda täze standartlary kesgitleýändigini, inženerçilik çözgütlerini, arhitekturany we täjirçilik maksatly ulanylyşyny birleşdirýändigini aýdýarlar.
