Hindistanda ilat ýazuwy başlandy we ol ilkinji gezek doly sanly görnüşde geçirilýär. Bu barada ýurduň Içeri işler ministrliginiň ýanyndaky Baş registrator we ilat ýazuwy boýunça komissar edarasy habar berdi.
Edaranyň maglumatlaryna görä, bu dünýäde iň uly sanly demografik barlag bolar. Gutarnykly netijeleri 2027-nji ýylda çap etmek meýilleşdirilýär.
Birinji tapgyrda ýaşaýyş şertleriniň hasaby alnyp barylýar. Hünärmenler öý hojalyklarynyň ýaşaýyş jaýy, emlägi we durmuş derejesi barada 33 sany sowal berýär. Ikinji tapgyr 2027-nji ýylyň fewralyna meýilleşdirilen bolup, onda ilat, onuň düzümi, girdeji derejesi, migrasiýa we dogluş baradaky maglumatlar ýygnalar.
Şeýle hem ilkinji gezek kastalaryň sany hem hasaplanar, onuň möhleti biraz soň yglan ediler.
Maglumatlar internet bolmazdan hem işläp bilýän ykjam goşundy arkaly ýygnalýar. Bu bolsa iň çetki nokatlary hem öz içine almaga mümkinçilik berýär.
1-nji aprelde başlanan bu ilat ýazuwy 2011-nji ýyldan bäri ilkinji we garaşsyzlyk alnandan bäri on altynjy ýazuw boldy. Onuň geçirilmegi üçin 1,25 milliard dollardan gowrak serişde bölüp berildi. Öňki maglumatlara görä, Hindistanyň ilaty 1,21 milliard adama deň.
