Halkara awtomobil federasiýasy (FIA) «Ferrari» toparynyň şikaýatyndan soňra, Formula-1-de bäsleşýän «Mercedes» bolidini barlagdan geçirer. Bu barada AutoRacer neşiri habar berýär.
Şikaýata tehniki düzgünnamanyň bozulmak ähtimallygy sebäp boldy. Düzgünlere görä, öňki we yzky anti-ganatlar biri-birinden 0,4 sekuntdan köp bolmadyk tapawut bilen ýapylmalydyr. Emma Hytaý Gran-prisinden soňra peýda bolan kadrlar Mercedes-de bu tapawudyň takmynan 0,8 sekuntdugyny görkezdi.
Şunlukda hünärmenler anti-ganatlaryň işindäki wagt uzynlygy, awtoulagyň tormoz berlen wagty durnuklylygyny artdyryp, oňa goşmaça artykmaçlyk berip biler diýip çaklaýarlar. «Ferrari» topary-da bu ýagdaýa üns berip, FIA-dan ulgamyň düzgünlere laýyk gelýändigi barada düşündiriş soraýar.
RacingNews365 neşiri bu şikaýatdan soň «Mercedes» toparynyň öňki anti-ganatyň gurluşyny düzgünnama laýyk getirendigini habar berdi. Toparyň wekilleri bolsa, Hytaýdaky bu bökdençligiň bilgeşleýin edilen hereket däldigini we onuň enjamyň ygtybarlylygy bilen baglydygyny mälim etdiler.
