Google kompaniýasy Android ulgamynda programmalary gurnamagyň düzgünlerini üýtgeder. Awgust aýyndan başlap, barlanmadyk işläp düzüjileriň APK-faýllaryny gurnamaklyk goşmaça barlagy we 24 sagada çenli garaşmagy talap eder.
Täze amal birnäçe ädimden ybaratdyr. Ulanyjy ilki bilen işläp düzüji režimini açmaly, özüniň meýletin hereket edýändigini tassyklamaly, soňra bolsa garaşma möhletiniň tamamlanmagyna garaşmaly. Şondan soň gurnamagy biometriki maglumatlar ýa-da PIN-kod arkaly tassyklamak gerek bolar.
Kompaniýa bu çäreleriň enjam eýesine basyş edip, zyýanly programmalary gurnatdyrmaga synanyşýan kezzaplardan goranmaga gönükdirilendigini düşündirdi.
Şol bir wagtda, bu amalyň diňe bir gezek geçiriljekdigi anyklanylýar. Bu tapgyrdan bir gezek geçensoň, ulanyjy gaýtadan garaşmazdan nätanyş çeşmelerden programmalary gurnap biler.
