Astanada Araly halas etmegiň Halkara Gaznasynyň (AHHG) Müdiriýetiniň mejlisi geçirildi. Çäre Gazagystanyň premýer-ministriniň orunbasary Kanat Bozumbaýewiň başlyklyk etmeginde geçdi diýip, Gazagystanyň Hökümetiniň metbugat gullugy habar berýär.
Mejlisiň işine sebitiň ýurtlarynyň wekilleri: Täjigistanyň premýer-ministriniň orunbasary Sulaýmon Ziýezoda, Özbegistanyň Prezidentiniň geňeşçisi Şuhrat Ganiýew, Gazagystanyň Suw serişdeleri we suwaryş ministri Nuržan Nuržigitow, şeýle hem gaznanyň ýerine ýetiriji komitetiniň başlygy Ashat Orazbaý gatnaşdy. Türkmenistana hökümetde oba hojalyk toplumyna gözegçilik edýän wise-premýer Taňryguly Atahallyýew wekilçilik etdi.
Gyrgyzystanyň wekiliýeti mejlise synçy hökmünde gatnaşdy.
Mejlis Gazagystanyň gaznada başlyklyk edýän döwrüniň jemleýji tapgyrynda geçirildi we AHHG-y esaslandyryjy döwletleriň Baştutanlarynyň duşuşygyna taýýarlyk ädimi boldy.
Duşuşygyň netijeleri boýunça bäş sany çözgüde gol çekildi. Olar 2026-njy ýylyň 22-nji aprelinde Astanada geçiriljek döwlet Baştutanlarynyň mejlisine taýýarlyk görmek, ýerine ýetiriji komitetiň işiniň netijeleri we gaznanyň gurluşyny kämilleşdirmek bilen baglanyşyklydyr. Şeýle hem halkara hyzmatdaşlar bilen utgaşykly hereket etmek boýunça resminamalar we indiki mejlisiň gün tertibi tassyklanyldy.
Mundan başga-da, Syrderýa basseýninde suw serişdelerini hasaba almagyň we paýlamagyň ulgamyny döretmek meselelerine hem-de 2026–2036-njy ýyllarda «Suwdan rejeli peýdalanmak boýunça amaly hereketleriň onýyllygyny» geçirmek baradaky başlangyçlara seredildi.
