Brigam adyndaky Massaçusets umumy hassahanasynyň we Braun uniwersitetiniň alymlary ysmaz adamlara barmaklarynyň hereketini hyýallarynda janlandyrmak arkaly tekst ýazmaga mümkinçilik berýän «beýni — kompýuter» interfeýsini döretdiler. Alymlar täze üstünlik barada Nature Neuroscience žurnalynda hem ýazdylar.
Bu tehnologiýa beýni gabygynyň hereketlendiriji bölegine oturdylan kiçijik datçikleri ulanýar. Adam hyýaly klawiaturanyň düwmelerine «basanda», ulgam şol signallary okaýar we emeli aň algoritmleriniň kömegi bilen harplara öwürýär.
Synaglara gapdal amiotrofiki sklerozly (myşsa iýmitlenmeginiň bozulmagy netijesinde hereketi togtadýan agyr kesel), şeýle-de oňurga ýiligi şikesli iki sany näsag gatnaşdy. Ulgam sazlanandan soň, olaryň birine minutda 110 belgi ýazmak başartdy. Bu görkezijiniň adaty adamyň klawiaturada ýazyş tizligine örän ýakyndygy begençli ýagdaýdyr. Onuň hatda ýalňyşlyk derejesi-de örän pes, bary-ýogy 1,6%-e deň boldy.
– Häzirki bar bolan alternatiw aragatnaşyk ulgamlary haýaldygy we ýalňyşlyklary sebäpli näsaglary köplenç lapykeç edýär. Biziň neýroprotezlerimiziň maksady doly güýçli we kämil saýlawa öwrülip bilmekdir – diýip, newrolog Daniel Rubin düşündirýär.
Gowy ýeri, näsaglar täze enjamy öý şertlerinde hem ulanyp bilýärler. Alymlar onuň geljekde diňe bir aragatnaşyk gurmakda däl, eýsem elleriň hereketini dikeltmekde hem kömek etjekdigine ynamlary uly.
