Soňky bäş günüň dowamynda ýagan güýçli ýagyşlar Owganystanda we Pakistanda uly möçberli siliň gelmegine hem-de binalaryň ýykylmagyna sebäp boldy. Duşenbe güni häkimiýetleriň beren maglumatyna görä, heläk bolanlaryň sany azyndan 45-e, ejir çekenleriňki bolsa 74-e ýetdi.
Degişli gulluklar durnuksyz howa şertleri sebäpli howpuň dowam edýändigini duýdurýar diýip Reuters agentligi habar berýär.
Tebigy betbagtçylyklara garşy göreşmek boýunça milli müdiriýetiň maglumatyna görä, Owganystanda wepat bolanlaryň agramly bölegi ýurduň merkezi we gündogar welaýatlaryna, şol sanda Parwan, Maýdan-Wardak, Daýkundi we Logar sebitlerinendir. Bu ýerlerde çabga ýagyşlary sil we süýşgünleri emele getirip, 130 sany öýi doly weýran etdi. Netijede 1140 maşgala zyýan çekdi.
Owganystan bilen serhetleşýän Pakistanyň Haýber-Pahtunhwa welaýatynda hem güýçli ýagyşlar öýleriň üçeklerini we diwarlaryny ýykdy. Welaýatyň betbagtçylyklara garşy göreşmek müdiriýetiniň habarynda bu ýagdaý zerarly heläk bolan 17 adamyň 14-siniň çagalardygy we ýene-de 25 adamyň dürli derejede şikes alandygy aýdylýar.
BMG Pakistany we Owganystany aşa weýrançylykly howa hadysalaryna hem-de klimatyň üýtgemegine has köp sezewar bolýan ýurtlaryň hataryna goşýar. Geçen ýyl Pakistanda bolan güýçli musson ýagyşlary 1000-e golaý adamyň ömür tanapyny kesip, ekin meýdanlaryna, mallara we ýaşaýyş jaýlaryna uly zyýan ýetiripdi.
BMG-niň Ösüş maksatnamasynyň 2025-nji ýylyň noýabrynda çap edilen hasabatynda ýer titremeleriniň, suw joşgunlarynyň we guraklygyň Owganystanda 8000 töweregi öýi weýran edendigi hem bellenilýär.
