2026-njy ýylyň 30-njy martynda Türkmenistanyň Mejlisi bilen Mongoliýanyň Beýik Döwlet Huralynyň arasynda döredilen parlamentara dostluk toparlarynyň wideoaragatnaşyk arkaly ilkinji duşuşygy geçirildi. Bu barada Türkmenistanyň Mejlisiniň metbugat gullugy habar berýär.
Gepleşikleriň dowamynda taraplar iki ýurduň döwlet Baştutanlarynyň tagallalary netijesinde ýola goýlan dostlukly gatnaşyklaryň dürli ugurlar boýunça ösdürilýändigini aýratyn belledi. Türkmen wekilleri Mongoliýanyň parlamentarilerini ýurduň Bitaraplyk ýörelgelerine esaslanýan daşary syýasaty, milli Parlamentiň gurluşy we amala aşyrylýan demokratik özgertmeleriň kanunçylyk binýady bilen tanyşdyrdy.
Duşuşykda parlament diplomatiýasynyň döwletara hyzmatdaşlygy berkitmekdäki orny ara alnyp maslahatlaşyldy. Hususan-da, kanunçykaryjylyk işinde tejribe alyşmak, ugurdaş komitetleriň, ýaş we zenan parlamentarileriň hem-de telekeçileriň arasyndaky gatnaşyklary işjeňleşdirmegiň möhümdigi nygtaldy. Şeýle hem taraplar parlament derejesindäki duşuşyklaryň we maslahatlaryň iki halkyň bähbidine hyzmat edýän hoşniýetli hyzmatdaşlygyň gerimini giňeltmäge ýardam etjekdigini tassyklady.
Söhbetdeşligiň ahyrynda türkmen tarapy «Garaşsyz, baky Bitarap Türkmenistan – bedew batly at-myradyň mekany» ýylynda ýurduň Garaşsyz Döwletleriň Arkalaşygynda (GDA) başlyklyk etmeginiň çäklerinde geçiriljek zenanlaryň dialogynyň, GDA-nyň Parlamentara Assambleýasynyň mejlisiniň we demografiýa meseleleri boýunça çäreleriň ähmiýetini nygtady.
