Warner Bros. kompaniýasy «Ýüzükleriň hökümdary» (Властелин колец) äleminde «Geçmişiň kölegesi» (Тень прошлого) atly täze filmiň üstünde işleýär. Bu barada režissýor Piter Jekson habar berdi.
Filmiň ssenarisini telealypbaryjy Stiwen Kolber, onuň ogly Piter MakGi, şeýle hem ilkibaşdaky trilogiýanyň döredilmegine gatnaşan Filippa Boýens ýazar. Filmiň 2027-nji ýylyň ahyryna meýilleşdirilen «Gollumy awlamak» (Охота на Голлума) filmi çykandan soň ekrana çykmagyna garaşylýar.
«Geçmişiň kölegesiniň» sýužeti Frodonyň ölüminden 14 ýyl soň bolup geçýär. Sem, Merri we Pippin dostunyň hatyrasyny tutmagy ýüreklerine düwüp, täze syýahata ugraýar. Şol bir wagtyň özünde, Semiň gyzy Eleonor bir syryň üstüni açýar we näme üçin Ýüzük urşunyň entek başlanmazdan ýeňlişli bolup biljekdigini anyklamaga synanyşýar.
Filmiň ekrana çykjak anyk senesi we režissýorynyň ady häzirlikçe aýan edilmedi. Mundan ozal «Gollumy awlamak» taslamasyna Keýt Winsletiň goşulandygy habar berlipdi. Şeýle hem şol filmde Ien MakKellen, Elaýja Wud we režissýor hökmünde çykyş edýän Endi Serkins hem peýda bolmaly.
Stiwen Kolberiň aýtmagyna görä, «Geçmişiň kölegesi» üçin ideýalaryň bir bölegi «Ýüzük doganlygy» kitabynyň gahrymanlaryň Köne tokaýlyga düşüp, howp bilen ýüzbe-ýüz bolýan we olary Tom Bombadiliň halas edýän bölümine esaslanýar.
