Ilon Maskyň esaslandyran «The Boring Company» kompaniýasy ABŞ-da üç sany täze ýolagçy tuneliniň gurluşygyna başlaýandygyny yglan etdi. Bu taslamalaryň ählisi kompaniýanyň öz serişdeleriniň hasabyna doly maliýeleşdiriler.
Täze Orleanda guruljak NOLA Loop, Baltimordaky Ravens Loop we Dallasdaky University Hills Loop tunelleri awtoulaglaryň ýerasty ýollar arkaly ýolagçylary has tiz daşamagy üçin niýetlenendir.
Kompaniýa ýene-de iki sany – Tennessi ştatyndaky Hendersonville Utility Tunnel we San-Antoniodaky Morgan's Wonderland Tunnel taslamalaryny durmuşa geçirmegi-de göz öňünde tutýar. Häzirki wagtda bu ýerasty ýollaryň gurluşygy tehniki-ykdysady seljermeleriň netijelerine we resmi rugsatlaryň alynmagyna bagly bolup durýar. Olar tassyklanan ýagdaýynda, ýene-de kompaniýanyň öz hasabyna maliýeleşdirilen gurluşyga girişiler.
Bu taslamalar The Boring Company kompaniýasynyň ýerasty ulag düzümini ösdürmek strategiýasynyň dowamydyr. Esasy maksat — uly şäherleriň ýollaryndaky dyknyşyklary azaltmak we adamlaryň gatnawyny has-da çaltlandyrmakdan ybaratdyr.
