FIFA 2026-njy ýylda geçiriljek Dünýä çempionatynda oýun düzgünlerine üýtgeşmeleri girizmek mümkinçiligini gözden geçirýär. Bu barada žurnalist Gaston Edul habar berdi. Häzirki wagtda bu maglumatyň resmi tassyklanmasy ýok.
Hödürlenilýän täze düzgünleriň arasynda oýunçy çalşygynyň wagtyny çäklendirmek bar: oýunçy meýdançany 10 sekundyň dowamynda terk etmeli. Eger bu möhlet berjaý edilmese, täze girýän oýunçynyň oýna goşulmagy gijikdiriler we topar bir minudyň dowamynda bir oýunçy azlykda galar.
Şeýle hem topy meýdançanyň gyrasyndan (autdan) oýna girizmegiň we derwezeden urgy urmagyň wagtyny bäş sekunda çenli azaltmak teklip edilýär. Düzgün bozulsa, topa eýelik etmek hukugy garşydaş tarapa geçer.
Meýdançada lukmançylyk kömegi berilýän oýunçy azyndan bir minutlyk oýundan çykmaly bolar. Diňe sary ýa-da gyzyl duýduryş bilen jezalandyrylan düzgün bozulmasy netijesinde şikes alnan ýagdaýlar muňa kadadan çykma hökmünde garalar.
VAR ulgamy meýdançadan kowulmaga sebäp bolýan ikinji sary duýduryşlary, şeýle hem ýalňyş berlen burçdan urgulary gaýtadan gözden geçirmek hukugyna eýe bolup biler.
Goşmaça hökmünde, diňe toparyň kapitanynyň düşündiriş sorap eminlere ýüz tutup biljekdigi baradaky düzgüni güýçlendirmek meýilleşdirilýär. Beýleki oýunçylara munuň üçin duýduryş berilmegi mümkin.
Şol bir wagtda, FIFA ýaryş üçin biletleriň satuwynyň soňky tapgyryny yglan etdi. Ol 1-nji aprelde başlar we finala çenli dowam eder. Oýunlar 11-nji iýun – 19-njy iýul aralygynda ABŞ-da, Kanadada we Meksikada geçiriler.
Eýýäm bir milliondan gowrak bilet satyldy, ýöne isleg heniz hem ýokary bolmagynda galýar. Şunuň bilen birlikde, guramanyň baha syýasaty muşdaklar we "Football Supporters Europe" guramasy tarapyndan birnäçe gezek tankyt edildi, hatda Ýewropa Komissiýasyna şikaýat hem ýollandy.
