28-nji martda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Arkadag şäherine iş saparyny amala aşyrdy. Saparyň dowamynda ol Gurbanguly Berdimuhamedow adyndaky Howandarlyga mätäç çagalara hemaýat bermek boýunça Haýyr-sahawat gaznasynyň ştab-kwartirasyna baryp gördi we şol ýerde guramanyň Müdiriýetiniň mejlisini geçirdi. Bu barada «Watan» habarlar gepleşiginde mälim edildi.
Mejlisde Gazna tarapyndan alnap barlan işleriň netijeleri we ýakyn geljek üçin wezipeler gözden geçirildi. Hususan-da, Gaznanyň döredilmeginiň 5 ýyllygy mynasybetli geçiriljek çärelere görlen taýýarlyk maslahatlaşyldy. Bu çäreleriň ýokary guramaçylyk derejesinde geçirilmeginiň zerurdygy nygtaldy.
Şeýle hem, guramanyň ýolbaşçylarynyň bitirilen işler, halkara hyzmatdaşlygy ösdürmek we bilelikdäki taslamalara gatnaşmak baradaky hasabatlary diňlenildi. Birnäçe halkara guramalar we hyzmatdaşlar bilen özara gatnaşyklaryň alnyp barylýandygy bellenildi.
Gurbanguly Berdimuhamedow Haýyr-sahawat gaznasynyň işini kämilleşdirmek, halkara gatnaşyklary ösdürmek we durmuşa geçirilýän maksatnamalaryň netijeliligini ýokarlandyrmak boýunça çäreleri dowam etdirmegi tabşyrdy.
Mundan başga-da, mejlisde Arkadag şäherini ösdürmek meselelerine, şol sanda gurluşygyň ikinji tapgyrynyň desgalarynyň we lukmançylyk klasteriniň gurluşygynyň barşyna garaldy. Işleriň möhletlerine we hiline gözegçilik etmegiň zerurdygy bellenildi.
