Toyota kompaniýasy Land Cruiser 250-niň iki sany täze ýokary wersiýasyny — VX we VX-L modellerini hödürledi. Olar ýolsuz ýerler we gündelik rahat sürüş üçin sazlandy.
VX görnüşi: esasy üns ýolsuzlyk şertlerine
VX toplumy asfaltsyz ýollarda sürmek üçin niýetlenendir. Ol klassyky modelleriň stilindäki tegelek faralary we täze «Smoky Blue» reňki bilen tapawutlanýar. Bu modelde esasy üns tehniki üpjünçilige gönükdirilýär.
Awtomobil yzky differensialyň elektron blokirlenmesine, öňdäki stabilizatory öçürmek ulgamyna, kert ýapgytlardan aşak düşülende kömek ediji ulgama we «Crawl Control» režimine eýe boldy. Şeýle hem, tigirleriň aşagyndaky ýerüsti gatlagy görkezmek funksiýasy bolan töwerekleýin syn ediş kameralary göz öňünde tutuldy. Salonda sanly enjam paneli we diagonaly 12,3 dýuým bolan Toyota Smart Connect+ multimedia ulgamy ýerleşdirildi.
VX-L görnüşi: rahatlyk we tehnologiýalar
VX-L modeli gündelik ulanylyşa gönükdirilendir. Ol deri salon, gyzdyryjy we ýelejiretme funksiýalary bolan oturgyçlar, şeýle hem 14 dinamikli JBL audioulgamy bilen enjamlaşdyrylandyr.
Tehnologiýalaryň arasynda proýeksion displeý we ulagyň yzyny görkezýän sanly aýna bar. Differensialyň berk blokirlenmesiniň deregine «Torsen» ulgamy ulanylýar, bu bolsa awtomobiliň ýolda özüni alyp barşyny gowulandyrýar.
Beýleki görnüşler we hereketlendirijiler
Toplumda esasy TX we TX-L görnüşleri hem saklanyp galýar. TX modeli ýönekeý üpjünçiligi bilen «işçi ulagynyň» wezipesini ýerine ýetirýär. TX-L bolsa elektrikli dolandyryş, klimat-kontrol we has kämil bezeg materiallary bilen goşmaça rahatlyk döredýär. Bu bolsa modeliň hemmetaraplaýyn bolmagyna mümkinçilik berýär.
Günbatar Ýewropada model Hybrid 48V gibrid ulgamy bilen üpjün edilýär. Gündogar Ýewropada bolsa 2.8 dizel hereketlendirijisi we 2.4 benzin turbomotory elýeterlidir. Iki enjam hem Toyota-nyň beýleki modelleri bilen gowy tanalýar we olar çydamlylygy hem-de çylşyrymly şertlerde ulanmaga ýaramlylygy bilen tapawutlanýar.
