Ynsanperwer hyzmatdaşlygy berkitmäge goşan şahsy goşantlary üçin käbir halkara guramalarynyň wekilleri Türkmenistanyň «Arkadag» medaly bilen sylaglanar. «Watan» habarlar gepleşiginde berlen maglumatlara görä, Prezident Serdar Berdimuhamedow Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň döredilmeginiň bäş ýyllygy mynasybetli degişli Permana gol çekdi.
Bu karar 27-nji martda sanly ulgam arkaly geçirilen Ministrler Kabinetiniň nobatdaky mejlisinde mälim edildi.
Mejlisiň dowamynda Prezident 29-njy martda Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň döredilenine bäş ýyl dolýandygyny belledi.
Döwlet Baştutany Gaznanyň esaslandyrylan gününden bäri iri halkara guramalar bilen ýakyndan hyzmatdaşlyk edýändigini tassyklady. Şunuň bilen baglylykda, döwlet Baştutany Halk Maslahatynyň Başlygy Gurbanguly Berdimuhamedowy we türkmen halkyny guramanyň döredilmeginiň 5 ýyllygy bilen tüýs ýürekden gutlady.
Wise-premýer, daşary işler ministri Raşid Meredow hem mejlise gatnaşyjylaryň adyndan Gurbanguly Berdimuhamedowy we ýurduň Prezidentini Haýyr-sahawat gaznasynyň döredilmeginiň bäş ýyllygy bilen gutlady. Guramanyň geçen bäş ýylyň dowamyndaky işiniň möhüm durmuş we haýyr-sahawat taslamalarynyň durmuşa geçirilmegi netijesinde giňden ykrar edilendigi bellenildi.
