Mýunhendäki Lýudwig-Maksimilian uniwersitetiniň alymlary adamyň saz saýlawy bilen onuň aň ösüşiniň arasyndaky baglanyşygy ýüze çykardylar. Gözlegiň netijeleri Journal of Intelligence žurnalynda çap edildi.
Ylmy barlaga 185 meýletinçi gatnaşdy. Hünärmenler 5 aýlap gatnaşyjylaryň diňleýän aýdym-sazlaryny öwrendiler. Munuň üçin olaryň telefonlaryna diňlenilýän aýdymlary we olaryň sözlerini hasaba alýan ýörite programma gurnaldy.
Netijede jemi 58 müňden gowrak aýdym seljerildi we gatnaşyjylar şolaryň esasynda pikirleniş we matematik ukyplary barlaýan ýörite testden geçdiler.
Barlagyň netijelerine görä, aň görkezijileri has ýokary bolan adamlar köplenç gussalyrak aýdymlary saýlapdyrlar. Şol bir wagtda, rep we hip-hop diňleýänleriň test netijeleri beýlekiler bilen deňeşdirilende ortaçadan-da pes boldy.
«Bolup geçýän pursatlary has çuň beýan edýän, durmuşy temalardaky aýdym saýlaýanlaryň aň ukyplarynyň has ýokarydygy anyklandy. Tersine, köpçülikde ulanylýan ýönekeý sözler bilen ýazylan aýdymlary diňleýänleriň görkezijileri pes boldy» diýlip, makalada bellenilýär.
Barlagyň awtorlary bu görkezijä gönümel düşünmeli däldigini nygtaýarlar. Ýagny, diňlenilýän eser adamyň intellektine täsir etmeýär-de, gaýta adam diňlejek aýdymyny intellektiniň emrine görä saýlaýar.
