Google kompaniýasy ozal «Google AI» tarifleriniň çäginde işleýän «Personal Intelligence» funksiýasynyň indi ähli ulanyjylar üçin mugt boljakdygyny yglan etdi.
Täze mümkinçilik Gemini ekoulgamyna birikdiriler, şeýle hem Google Chrome brauzeriniň web-wersiýasynda we «AI Mode» tertibinde goýlar.
Bu funksiýa emeli aň bilen has düşnükli aragatnaşyk saklamak üçin niýetlenendir. Ulgam ulanyjynyň Google hyzmatlaryndaky Gmail (elektron poçta), Google senenamasy (Calendar), Google Disk (Drive), Google Fotosuratlary (Photos), YouTube, Google Kartalary we Google Gözlegi ýaly hyzmatlary ulanan wagtyndaky maglumatlary seljerýär we şolaryň esasynda onuň nämeleri gowy görýändigini anyklaýar. Netijede, soň öz geregi çykan ýerinde oňa artyk sorag berip durman, iň talabalaýyk jogaplary taýýarlaýar.
«9to5Google»-yň düşündirişine görä, emeli aň gündelik meseleleri çözmäge-de kömek edip biler. Meselem tehniki kömege zerurlyk çykanda sanly çekler arkaly enjamyň modelini anyklap, döreýän näsazlyklary düzetmegiň ýoluny hödürläp biler ýa ýakyn-u-daş ýerlere syýahata çykylsa, işdäňe we halaýan reňkiňe gabat gelýän iň gowy salgylary we iýmitleniş nokatlaryny saýlap biler, şeýle hem uçuş-gonuş wagtlary barada-da duýduryp durar.
Bu ýeňillik, ilki ABŞ-da elýeterli bolar. Ony ulanmak üçin Google hasabyň bolmagy we funksiýanyň elin işledilmegi talap edilýär. Soň ulanyjylar «Personal Intelligence» atly ýörite bölüm arkaly öz maglumatlaryna rugsady özleri sazlap bilerler.
