Halkara futbol assosiasiýalarynyň federasiýasy (FIFA) zenanlar toparlaryny tälimçiler düzümine aýal-gyzlary goşmaga borçly etdi. Bu çözgüt guramanyň geňeşiniň mejlisinde kabul edildi we onuň resmi saýtynda ýerleşdirildi.
Täze düzgün FIFA-nyň howandarlygynda ýygyndylaryň we klublaryň arasynda geçirilýän, ýetginjekler derejesinden başlap, ulularyň ýaryşlaryna çenli ähli ýaryşlara degişlidir. Indi her bir toparyň ätiýaçlyk oturgyjynda azyndan iki sany zenan tälimçi bolmaly, şeýle hem azyndan bir zenan baş tälimçi ýa-da kömekçi wezipesinde bolmalydyr.
Bu başlangyç tälimçilik kärinde aýal-gyzlaryň sanyny artdyrmaga gönükdirilendir. Bu talap sentýabr aýynda Polşada geçiriljek 20 ýaşa çenli gyzlaryň arasyndaky dünýä çempionatynda ilkinji gezek, soňra bolsa U-17 ýaryşynda we aýal-gyzlaryň arasyndaky Çempionlar kubogynda güýje girer. Geljekde bu düzgün 2027-nji ýylda Braziliýada geçiriljek dünýä çempionatynda hem ulanylar.
2023-nji ýyldaky dünýä çempionatynda 32 sany baş tälimçiniň diňe 12-si zenandy. Alty sany ýygyndy topar — Argentina, Kolumbiýa, Fransiýa, Gaiti, Marokko we Filippinler tälimçiler düzüminde hiç bir zenan maşgala bolmazdan işledi.
