Hytaýyň Szýansu sebitindäki ýaşaýjylara horlanylan her 0,5 kg agramy üçin sygyr etiniň önümlerini (dil, guýruk we iç-goşlary) sowgat berýän täze aksiýa yglan edildi.
South China Morning Post neşiriniň habar bermegine görä, şeýle aksiýa 9-njy martda Usi şäheriniň Lýansi raýonynyň Şanbeý obasynda başlandy we 20-nji marta çenli dowam etdi. Gatnaşmak üçin 2400-den gowrak adam arza berdi. Esasy agram çekmek işleri 23-nji martdan 27-nji marta çenli geçiriler. Şondan soň gatnaşyjylar horlanyp başlarlar we öz netijeleri barada geljek ýylyň ýanwar aýynyň 1-inden 10-yna çenli ýörite komissiýany habardar ederler.
Aksiýa diňe ady agzalan sebitdäki durmuş üpjünçiligi hyzmatlaryny ýa-da lukmançylyk ätiýaçlandyryş töleglerini edýän ýerli ýaşaýjylara niýetlenendigi bellenilýär. Gatnaşyjylaryň beden agramynyň indeksi-de 23-den ýokary bolmalydyr. Aslynda bu indeks boýunça adamda 18,5-den 24,9-a çenli aralyk kadaly hasaplanýar. Aksiýa gatnaşmak isleýän aýallaryň biliniň ýogynlygy 80 sm-den, erkekleriňki bolsa 90 sm-den geçmegi-de hökmanydyr.
Bütindünýä Saglygy Goraýyş Guramasynyň bilermenleri käbir Aziýa ýurtlary üçin beden agramynyň indeksiniň halkara kadalardan has pes bolup biljekdigini belleýärler.
