Nissan kompaniýasy Amerikanyň Tennessi ştatyndaky zawodda öndürilýän Murano krossowerini Ýaponiýanyň bazaryna ibermek meýilnamasyny yglan etdi. Häzirki wagtda bu model bu ýurtda satylmaýar.
Mundan ozal Toyota we Honda kompaniýalary hem meňzeş ädimler barada habar beripdiler. "Yza importyň" ösmegi köplenç syýasy faktorlar bilen baglanyşdyrylýar.
ABŞ-da Nissan Murano modeli 241 at güýjüne we 353 Nm aýlaw pursatyna eýe bolan iki litrlik turbirlenen hereketlendiriji bilen enjamlaşdyrylýar. Awtoulag dokuz basgançakly awtomatiki geçiriji guty we doly çekiji ulgam bilen üpjün edilen. Model baý toplumda hödürlenýär, onuň Amerika bazaryndaky bahasy 41 670 dollardan 49 800 dollara çenli ýetýär.
Nissan kompaniýasynyň ýolbaşçysy Aýwen Espinoza Murano modeliniň Ýaponiýada peýda bolmagynyň kompaniýanyň modeller hataryny giňeltjekdigini we alyjylaryň isleglerini has gowy kanagatlandyrmaga mümkinçilik berjegini mälim etdi.
Çaklamalaryň birine görä, ABŞ-da öndürilen awtoulaglaryň Ýaponiýa iberilmegi iki ýurduň arasyndaky söwda deňagramlylygyny sazlamaga hem gönükdirilendir.
Iberilmeleriň 2027-nji ýylyň ilkinji aýlarynda başlanmagyna garaşylýar. Şeýle hem Toyota we Honda kompaniýalary ozal ýerli bazarda bolmadyk Camry, Highlander, Tundra, Passport we Integra ýaly modellerini Ýaponiýada satmagy göz öňünde tutýarlar.
