ÝUNESKO ýene on ýyl çemesi wagtdan Ortaýer deňzinde sunaminiň ýüze çykmak ähtimallygynyň bardygy hakynda duýduryş berdi. Hünärmenleriň çaklamasyna görä, Fransiýanyň kenarýakalary hem howply zolakda ýerleşýär.
Şol sebäpli gurama bu sebiti doly derejede howpsuz hasap etmeýär. Bu ätiýajyň esassyz däldigini weýran ediji tolkunlaryň Fransiýanyň kenarlaryna çenli ýetip biljekdigini we öň beýle hadysanyň bolandygyny tassyklaýan taryhy maglumatlar hem subut edýär.
Degişli hünärmenler sunaminiň diňe bir ýer titreme arkaly döremeýändigini düşündirýärler. Howpuň emele gelmegine suwasty süýşgünler ýa-da wulkanlaryň atylmagy, şeýle-de portlary suw basmagy we kenarýaka desgalary harap etmäge ukyply güýçli akymlar hem sebäp bolup bilýär.
Muňa mysal hökmünde, 1979-njy ýylda Nissa şäherinde bolup geçen wakany ýatlamak ýeterlik. Gurluşyk işleriniň barşynda suwasty süýşgüniň uly tolkun döretmegi zerarly ýüze çykan betbagtçylykly ýagdaý sekiz adamy heläk edipdi.
ÝUNESKO Hökümetara okeanografiýa komissiýasy arkaly sunami barada irki duýduryş berýän global ulgamlary utgaşdyrýar. Bu ulgamlar 2004-nji ýylda Hindi ummanynda bolan pajygaly wakadan soň döredildi. Olar datçik torundan, sebit merkezlerinden we «Sunama taýýarlyk» atly okuw maksatnamasyndan ybaratdyr. Olaryň esasy wezipesi bolsa, kenarýaka çäkleriň howpsuzlygyny ýokarlandyrmak we ilaty döräp biläýjek howplardan habardar hem taýynlykly etmekdir.
