Aktýorlar Emili Blant we Killian Mýorfi «Ümsüm ýer-3» filmine gatnaşjakdyklaryny tassykladylar. Bu barada «Deadline» neşiri habar berdi.
Filmiň tanyşdyrylyşy 2027-nji ýylyň 30-njy iýulyna meýilleşdirildi. Taslamanyň režissýory, ssenaristi we prodýuseri hökmünde ýene-de Jon Krasinski çykyş eder. Filmde şeýle hem Millisent Simmonds, Noa Jup, Jek O’Konnell, Jeýson Klark we Keti O’Braýan ýaly meşhur aktýorlar keşp janlandyrarlar.
Taslama bilen Krasinski we Ellison Siger tarapyndan esaslandyrylan «Sunday Night Productions» kompaniýasy meşgullanar. Önümçilik işlerine «Platinum Dunes» studiýasy hem gatnaşýar.
«Ümsüm ýer» franşizasy 2018-nji ýylda başlandy. Häzirki wagta çenli onuň düzümine üç film girýär we dünýä boýunça umumy girdejisi 900 million dollardan geçdi. Täze bölümiň Ebbottlar maşgalasynyň taryhyny dowam etdirmegine garaşylýar.
