Beýik Britaniýanyň Burberry moda brendi şa zenany Ýelizaweta II-niň doglan gününiň 100 ýyllygyna bagyşlanan çäkli mukdardaky kolleksiýasyny hödürledi. Mahabat kampaniýasynyň suratlary markanyň sosial ulgamlarynda paýlaşyldy.
Kolleksiýanyň özeni Burberry markasynyň meşhur gözenek nagyşly eşiklerinden ybarat boldy. Bu nagyş merhum şa zenanynyň hem iň gowy görýän nagyşlarynyň biridi. Nagyş onuň paltolarynyň ýüpek içliklerinde we kaşemir şarflarynda kän gabat gelýärdi.
Kolleksiýanyň iň esasy önümleriniň biri, elde Balmoral galasynyň suraty nagyşlanan ýüpek ýaglykdyr. Şotlandiýadaky bu gala Britaniýanyň şa maşgalasynyň iň gowy görýän rezidensiýasy hasaplanýar.
Täze kolleksiýada korgi tohumly itiň şekilindäki döş bezegi hem peýda boldy. Emaldan ýasalan bu kiçijik şekil dür däneleri bilen bezelipdir we oňa gözenek nagyşly palto geýdirilipdir. Korgi tohumy Ýelizaweta II-niň iň gowy görýän iti bolup, ol ömrüniň dowamynda şeýle itleriň 30-dan gowragyny saklapdyr.
Dizaýnerler bu mowzugyň saýlanyp alynmagyny şa zenanynyň 100 ýyllygy bilen birlikde onuň taryha, moda we dünýä medeniýetine ýetiren täsiri bilen düşündirdiler. Ýelizaweta II-niň arhiw suratlaryndaky keşbi häzirki wagtda hem meşhur adamlara we sungat muşdaklaryna ylham berýär.
Ýurdy 70 ýyllap dolandyran Ýelizaweta II 2022-nji ýylyň 8-nji sentýabrynda 96 ýaşynda Şotlandiýadaky Balmoral galasynda aradan çykdy. Şa zenany aradan çykanyndan soň tagt onuň uly ogly — şazada Çarlza geçdi.
