Marsy öwrenýän Curiosity marsohody planetanyň ýüzündäki bir daşy tötänleýin döwdi we onuň içinden arassa kükürdi ýüze çykardy. Waka gadymy suwuň yzlary öwrenilýän Gediz-Wallis kanalynda bolup geçdi. Mundan ozal Gyzyl planetada diňe sulfatlar — kükürdiň başga maddalar bilen birleşmesi tapylýardy.
Şeýle hem, şol töwerekde meňzeş görnüşli ýene-de birnäçe daşlar tapyldy. Bu bolsa şol jelegaýda kükürdiň giňden ýaýran bolmagynyň mümkindigini görkezýär.
Alymlar sap kükürdiň emele gelmegi üçin örän aýratyn şertleriň gerekdigini belleýärler. Şu wagta çenli şol sebitde beýle şertleriň bolandygy tassyklanylmandy. Şol sebäpli, bu açyş häzirki ylmy nukdaýnazaryndan düşünmesi kyn ýagdaýy döredýär.
Belli bolşy ýaly, kükürt durmuşda iň möhüm elementleriň biri. Bu tapyndy hem Marsda haçandyr bir wagt ýaşaýşyň bolandygyny kesgin subut etmese-de, ol hakdaky maglumatlary baýlaşdyrýar. Galyberse-de, öň hem ol ýerde suwuň we ýaşaýyş üçin amatly bolup biljek şertleriň alamatlary tapylypdy.
Iň gyzykly ýeri, açyşyň düýbünden tötänleýin bolmagydyr. Eger-de daş döwilmedik bolsa, onuň düzümi nämälimligine galyp bilerdi. Indi hünärmenlere arassa kükürdiň Marsyň ýüzünde nähili peýda bolandygyny anyklaýmak galýar.
