FIFA 2026-njy ýylda geçiriljek dünýä çempionatynyň öňüsyrasynda YouTube bilen hyzmatdaşlyk etjekdigini yglan etdi. Mundan ozal FIFA şuňa meňzeş ylalaşygy TikTok bilen hem baglaşypdy.
Gürrüň ýaryşyň doly göni ýaýlymy barada gitmeýär. Hyzmatdaşlar käbir oýunlary dolulygyna, şeýle hem her oýnuň ilkinji 10 minutyny göni ýaýlymda görkezip bilerler. Bu çemeleşmäniň tomaşaçylary esasy ýaýlymlara çekjekdigi çak edilýär.
Mundan başga-da, media hyzmatdaşlary oýunlaryň dürli burçlardan düşürilen wideolaryna elýeterlilik alarlar. Bu bolsa goşmaça kontentleri — synlary, seljermeleri we eksklýuziw materiallary döretmäge mümkinçilik berer.
FIFA-nyň baş sekretary Mattias Grafström bu hyzmatdaşlygyň dünýäniň çar künjegindäki janköýerler üçin çempionaty has elýeterli etmäge kömek etjekdigini belledi.
2026-njy ýylyň dünýä çempionaty 11-nji iýundan 19-njy iýula çenli ABŞ-nyň, Kanadanyň we Meksikanyň 16 şäherinde geçiriler.
