ABŞ-da muzeýe gelen iki sany erkek kişi takmynan 10 müň ýyllyk taryhy bolan we gymmaty 200 müň dollar diýlip bahalandyrylýan mamontyň gyýagyny döwdüler. Bu ýakymsyz waka barada New York Post neşiri habar berýär.
Polisiýanyň maglumatyna görä, 46 ýaşly Brett Howard we 48 ýaşly Todd Azewedo Kaliforniýadan Missuri ştatyna gelip, ýerli muzeýe gezelenç ediýärler. Gezelenç wagtynda olaryň biri beýlekisiniň egnine münüp, agramy 90 kg-a golaý bolan tüýli mamontyň gyýagyny ellemäge synanyşýar.
Netijede, bolgusyz hereketler zerarly taryhy gymmatlyk ýere gaçyp, birnäçe bölege bölünýär. Bu waka şolbada wideo-gözegçilik kameralarynda görülýär.
Olar muzeý işgärine tutdurman, çalasynlyk bilen binadan gaçyp çykmaga ýetişen-de bolsalar, polisiýanyň elinden welin, sypyp bilmeýärler.
Netijede düzgün bozujylaryň ikisi-de birinji derejeli uly zeper ýetirmek aýyplanmasy bilen saklanyldy. Häzirki wagtda olaryň her biri 15 müň dollar girew puly töläp, wagtlaýyn boşadyldy. Ýöne iş munuň bilen bitenok. Olara 4 ýyla çenli azatlykdan mahrum edilme jezasy-da garaşýar.
«Bu öwezini dolup bolmajak ýitgidir. Şeýle gadymy tapyndylaryň ornuny hiç zat bilen tutup bolmaz» diýip, Teni okrugynyň şerifi Bred Deniels gynanyp gürrüň berýär.
