Türkmenistanyň Prezidenti Serdar Berdimuhamedow sanly ulgam arkaly geçirilen Ministrler Kabinetiniň mejlisinde ýurduň ähli welaýatlarynda gowaça ekişine 25-nji martda başlamaga ak pata berdi. Bu barada «Watan» habarlar gepleşiginde mälim edildi.
Möwsümleýin oba hojalyk işleriniň alnyp barlyşy barada wise-premýer T.Atahallyýew hasabat berdi. Onuň aýtmagyna görä, bugdaý ekilen meýdanlarda mineral dökünler bilen iýmitlendirmek, ösüş suwuny tutmak işleri dowam edýär.
Şeýle hem sebitlerde ýeralma we gök-bakja ekinlerine ideg etmek hem-de olary ekmek işleri alnyp barylýar. Bu çäreler azyk önümleriniň öndürilýän möçberlerini artdyrmaga we ilaty üpjün etmäge gönükdirilendir.
Gowaça ekişine taýýarlyk görmegiň çäginde oba hojalyk tehnikalary, gurallary we tohumlar doly taýýar edildi. Wise-premýer döwlet Baştutanyndan gowaça ekişine başlamagyň senesini belläp, oňa ak pata bermegi haýyş etdi.
Prezident hasabaty diňläp, oba hojalygy toplumlaýyn ösdürmegi dowam etdirmegi we bugdaýa ideg edilende agrotehniki kadalaryň berk berjaý edilmegini tabşyrdy.
Döwlet Baştutany pagtaçy babadaýhanlar üçin öňde duran möwsümiň ähmiýetini belledi we ekiş möwsümine 25-nji martda başlamaga rugsat berdi. Ol hormatly ýaşululardan «bismilla» bilen işlere ak pata bermeklerini haýyş etdi we oba hojalyk işgärlerine zähmet üstünliklerini arzuw etdi.
