Sony Pictures amerikan kinokompaniýasy Labubu oýunjagy baradaky filmiň önümçiligine başlady diýip, CNBC habar berýär.
Kompaniýa filmi düşürmek hukugyny 2025-nji ýylyň noýabrynda Hytaýyň Pop Mart oýunjak öndürijisinden satyn aldy. Filmiň režissýory we prodýuseri hökmünde «Paddingtonyň başdangeçirmeleri» (2014), «Paddingtonyň başdangeçirmeleri 2» we «Wonka» (2023) filmleri, şeýle hem «Maýti Buş» serialy bilen tanalýan Pol King çykyş eder.
Ol dramaturg we ssenariçi Stiwen Lewenson bilen bilelikde ssenariý ýazmak işi bilen hem meşgullanar. Film kompýuter grafikasynyň kömegi bilen düşüriler.
Labubu personažy 2015-nji ýylda suratkeş Kasing Lung tarapyndan döredildi. 2019-njy ýylda Pop Mart dürli reňkli Labubu brelok-oýunjaklaryny çykaryp başlady.
Labubu — towşan gulakly we dişlerini görkezip, giňden ýyrşaryp duran nägehan şekilindäki ýumşak oýunjakdyr. Breloklar garaşylmadyk sowgat gutularynda satylýar, resmi dükanlarda hakyky oýunjaklaryň bahasy 17 funt sterlingden (22 dollar) başlanýar. Olar 2025-nji ýylda blogerleriň we tanymal şahsyýetleriň kömegi bilen giň meşhurlyga eýe boldy.
