Orient Express Corinthian ýelkenli kruiz gämisi özüniň hereketlendiriji ulgamynyň synaglaryny üstünlikli tamamlady we degişli ölçegdäki ýelkenli gämiler üçin täze tizlik rekordyny goýdy.
Dünýäde şeýle görnüşli iň uly gämi bolmaga taýýarlanýan bu gäminiň uzynlygy 220 metr töweregi bolup, umumy sygymy 25 200 tonna deňdir. Gämi has eksklýuziw syýahat görnüşi üçin niýetlenendir: gäminiň bortunda 110 ýolagçy ýerleşip biler, olar üçin 54 sany kaşaň otag göz öňünde tutuldy.
Gäminiň esasy aýratynlygy Fransiýanyň Chantiers de l’Atlantique gämi gurluşyk kompaniýasy tarapyndan işlenip düzülen «Solid Sail» ýelken ulgamydyr. Ol umumy meýdany tas 4 500 inedördül metr bolan ýelkenleri göterýän üç sany bogaldakdan ybarat. Ýeliň güýji ýeterlik bolmadyk ýagdaýynda, gämi suwuklandyrylan tebigy gaz bilen işleýän kömekçi hereketlendirijisini ulanyp biler.
Golaýda geçirilen synaglar wagtynda gämi diňe ýelkenleriň kömegi bilen sagatda tas 22 kilometr tizligi almagy başardy. Gämi gurluşykçylaryň aýtmagyna görä, bu şeýle ululykdaky ýelkenli gämi üçin görlüp-eşidilmedik görkezijidir. Gämi ulanmaga berleninden soň, onuň iň ýokary tizliginiň sagatda 32 kilometre ýetmegine garaşylýar.
Orient Express Corinthian ýeli mümkin boldugyndan ýokary derejede netijeli ulanmak we ýokary dolandyryjylygy üpjün etmek üçin niýetlenen öňdebaryjy ýelken ulgamyny ulanýar. Gämi özüne mahsus bolan balestron gurluşlarynda oturdylan, beýikligi tas 69 metr bolan uglerod süýüminden ýasalan üç bogaldak bilen enjamlaşdyryldy.
Gämini 2027-nji ýylyň ýazynda müşderä gowşurmak meýilleşdirilýär, bu bolsa ýelkenli kruiz gämileriniň geljekki flotuny giňeltmäge mümkinçilik berer.
