2026-njy ýylyň 18-nji martynda Türkmenistanyň Daşary işler ministrliginde ministriň orunbasary Mähri Bäşimowa bilen Niderlandlar Patyşalygynyň Türkmenistandaky ilçisi (oturýan ýeri Astana şäheri) Nikolaas Shermersiň arasynda duşuşyk geçirildi. Bu barada daşary syýasat edarasynyň metbugat gullugy habar berýär.
Söhbetdeşligiň barşynda taraplar iki ýurduň arasyndaky ikitaraplaýyn hyzmatdaşlygyň häzirki ýagdaýyna baha berip, gatnaşyklary ösdürmegiň geljekki ugurlary barada pikir alyşdy.
Duşuşykda özara bähbitli hyzmatdaşlygy giňeltmek üçin bar bolan uly mümkinçilikler bellenilip, döwlet edaralarynyň, işewür toparlaryň hem-de ylym-bilim edaralarynyň arasyndaky gatnaşyklary işjeňleşdirmäge aýratyn gyzyklanma bildirildi.
Şonuň bilen birlikde, taraplar ikitaraplaýyn gatnaşyklaryň şertnama-hukuk binýadyny has-da berkitmegiň hem-de halkara guramalaryň we sebit başlangyçlarynyň çäginde özara goldaw bermegiň ähmiýetini nygtady. Gepleşikleriň ahyrynda taraplar netijeli dialogy ähli ugurlar boýunça dowam etdirmäge we hyzmatdaşlygy täze derejä götermäge taýýardyklaryny tassyklady.
