Türkmenistanyň Halk Maslahatynyň Başlygy Gurbanguly Berdimuhamedow Hytaý Halk Respublikasynyň Başlygy Si Szinpiniň çakylygy boýunça dostlukly sapar bilen Hytaýa bardy. Bu barada «Watan» habarlar gepleşiginde habar berildi.
Türkmen halkynyň Milli Lideri paýtagtyň Halkara howa menzilinde syýasy partiýalaryň, jemgyýetçilik guramalarynyň ýolbaşçylary we beýleki resmi adamlar bilen duşuşyk geçirdi.
Söhbetdeşligiň dowamynda soňky ýyllarda Türkmenistan bilen Hytaýyň arasyndaky hyzmatdaşlygyň hil taýdan täze derejä çykýandygy bellenildi. Iki ýurduň parlamentara gatnaşyklarynyň we syýasy partiýalarynyň arasyndaky özara hereketleriň işjeň ösýändigi nygtaldy. Yzygiderli amala aşyrylýan özara saparlar hyzmatdaşlygyň mazmunynyň giňelmegine ýardam edýär.
Gurbanguly Berdimuhamedow, şeýle hem Halk wekilleriniň Ählihytaý ýygnagynyň golaýda geçirilen mejlisinde howpsuzlyk, medeniýet, ösüş we dolandyryş ulgamlarynda kabul edilen başlangyçlara ünsi çekdi. Bu başlangyçlaryň Türkmenistanyň «Ösüş arkaly parahatçylyk» we «Dialog — parahatçylygyň kepili» atly başlangyçlary bilen utgaşýandygy, şeýle hem Beýik Ýüpek ýoluny dikeltmek we medeni mirasy wagyz etmek ugrundaky tagallalar bilen baglanyşyklydygy bellenildi.
Medeni-ynsanperwer hyzmatdaşlygyň ähmiýeti aýratyn nygtaldy. Hytaýyň ýokary okuw mekdeplerinde müňlerçe türkmen talyby bilim alýar. Bu ugurda türkmen wekiliýetiniň 2025-nji ýylyň awgustynda Hytaýa amala aşyran sapary, onuň çäginde bilim ulgamynyň wekilleri bilen geçirilen duşuşyklar we Hytaýyň ýaşlarynyň ylmy-tehniki we medeni gatnaşyklar merkezine barylmagy ýatlanyldy.
Energetika, oba hojalygy we ulag ulgamlaryndaky hyzmatdaşlyk iki ýurduň özara gatnaşyklarynyň esasy ugurlary bolmagynda galýar.
Gurbanguly Berdimuhamedowyň uçary birnäçe sagatdan soň Pekiniň «Şoudu» halkara howa menziline gondy we bu ýerde ony HHR-iň resmi adamlary garşylady.
Halk Maslahatynyň Başlygynyň Hytaýa sapary dowam edýär.
