Hýuston uniwersitetiniň barlagçylary gaty jisimleriň fizikasy ugrunda täze üstünlik gazanandyklaryny mälim etdiler. Alymlar atmosfera basyşynda we minus 122 gradus Selsiý temperaturada elektrik toguny ýitgisiz geçirmäge ukyply bolan aşa ýokary geçiriji material döretdiler.
Bu netije 1993-nji ýylda goýlan öňki dünýä rekordyndan 18 gradus ýokarydyr.
Täze materialyň esasyny kuprat — simapdan, bariýden, kalsiýden, misden we kisloroddan ybarat bolan himiki birleşme düzýär. Ol ozal rekord eýesi hasaplanan Hg1223 maddasynyň döwrebaplaşdyrylan görnüşidir.
Fizikler bu işde adatdan daşary usuly ulandylar. Ilki bilen material minus 268 gradus Selsiý temperaturada takmynan 186 müň atmosfera basyşyna çenli gysyldy. Soňra bolsa, maddanyň üýtgän gurluşyny saklap, basyş çaltlyk bilen aýryldy.
Barlagyň awtorlarynyň aýtmagyna görä, beýle çemeleşme beýleki aşa ýokary geçiriji materiallary döretmäge hem kömek edip biler. Geljekde bu açyş örän ýokary basyşy saklamak zerurlygy bolmazdan, otag temperaturasyna golaý şertlerde togy garşylyksyz geçirip bilýän maddalaryň peýda bolmagyny ýakynlaşdyryp biler.
