«Amerikaly meşhur aktýor Bredli Kuper «Ouşeniň on bir dosty» filminiň prikweline režissýorlyk etmek isleýär» diýip, Deadline neşiri habar berýär.
Çeşmäniň berýän maglumatyna görä, Kuper diňe bir režissýor bolmak bilen çäklenmän, eýsem ssenariýany ýazmagy we baş keşbi janlandyrmagy-da meýilleşdirýär. Häzirki wagtda aktýor taslama gatnaşmak boýunça gepleşikleri geçirýär. Ýöne bu boýunça gutarnykly ylalaşyk gazanylandygy hakynda heniz maglumat ýok.
Aslynda ozal filmiň režissýory hökmünde Li Aýzek Çun göz öňünde tutulýardy. Emma ol surata düşüriliş işleriniň başlamagyna bir ýyldan gowrak wagt barka, taslamadan ýüz öwürdi.
Golaýda Kuperiň «Bu zat işleýärmi?» («Эта штука работает?») atly täze filmi ekranlara çykdy. Ol bu kinofilmde Uill Arnett we Laura Dern bilen bilelikde surata düşdi. Onda Kuper bilen Dern biri-birinden sowaşyp barýan är-aýal — Aleksyň we Tessiniň keşbini janlandyrýarlar.
Maşgalasynyň dargaýan pursadynda Kuperiň gahrymany stend-ap arkaly durmuşyndan täze many gözlemäge synanyşýar.
