Renault kompaniýasy ilkinji gezek täze RGEV medium 2.0 modul platformasyny görkezýän R-Space Lab konsepsiýa kompaktweni bilen tanyşdyrdy. Bu arhitektura seriýaly gibridler we elektrik awtoulaglary üçin niýetlenendir.
Awtoulagyň görnüşi Scenic we Espace modelleriniň öňki nesillerini ýatladýar. Şeýle-de bolsa, bu konsepsiýa belli bir seriýalaýyn öndüriljek ulag üçin prototip däl. Işläp düzüjiler onuň brendiň geljekki bäş ýyl üçin — dizaýnda, tehnologiýada we güýç gurluşlarynda — ösüş ugruny görkezýändigini belleýärler. Renault 2030-njy ýyla çenli 14 täze modeli, şol sanda bitewi göwrümli awtoulaglary hem çykarmagy meýilleşdirýär.
R-Space Lab-yň uzynlygy 4,5 metr. Salonynda bäş sany aýratyn oturgyç bar we üçegi tutuş diýen ýaly aýnadan ýasalypdyr. Awtoulagyň giň burç bilen açylýan çarçuwasyz gapylary bar.
Adaty roluň ýerine tigirlere mehaniki baglanyşygy bolmadyk şturwal ulanylýar. Panelde giň LCD displeý, şeýle hem aýlanýan dolandyryş düwmesi we standart düwmeleri bolan aýratyn merkezi ekran bar. Goş gutujygynyň gapagyny aşak açyp, aýakgoýar hökmünde ulanyp bolýar.
Platforma dürli kuzow görnüşlerine eýe bolan B, C we D klasly ulaglar üçin niýetlenendir. Elektrik ulaglary bir ýa-da iki hereketlendiriji we yzky ýa-da doly hereketlendiriji bilen elýeterli bolar. Gibridleriň öň tarapynda benzin hereketlendirijisi, yzky tarapynda bolsa elektrik hereketlendirijisi bolar.
Platforma 800 wolta çenli zarýad berilmegi goldaýar. Elektrik awtoulaglary 750 kilometre çenli, gibrid awtoulaglar bolsa 1400 kilometre çenli ýol geçip bilýär. Bu arhitekturany Dacia we Alpine hem ulanmagy meýilleşdirýärler. Işläp düzüjiler onuň önümçilik çykdajylaryny 40%-e çenli azaltjakdygyny çaklaýarlar.
