Türkmenistanyň Prezidenti, ýurduň Ýaragly Güýçleriniň Belent Serkerdebaşysy Serdar Berdimuhamedow çagyryş boýunça harby gullugy geçýän harby gullukçylary harby gullukdan boşatmak hem-de raýatlaryň harby gulluga nobatdaky çagyrylyşy hakynda Permana gol çekdi. Bu barada TDH habar berýär.
Resminama laýyklykda, kanun tarapyndan bellenen möhletleri gulluk eden harby gullukçylar 2026-njy ýylyň aprel–iýun aýlarynda Türkmenistanyň Ýaragly Güýçlerinden, beýleki goşunlaryndan we harby edaralaryndan harby gullukdan boşadylar.
Çagyryş gününe çenli 18 ýaşy dolan hem-de harby gulluga çagyryşdan boşamak ýa-da harby gulluga çagyryş möhletini yza süýşürmek hukugy bolmadyk Türkmenistanyň erkek raýatlary, şeýle hem gulluga çagyryş möhletini yza süýşürmek hukugyny ýitiren, 27 ýaşa çenli bolan raýatlar bellenilen döwürde harby gulluga çagyrylar.
Permanyň kabul edilmegi Türkmenistanyň Konstitusiýasyna we «Harby borçlulyk we harby gulluk hakyndaky» Kanuna laýyk gelýär. Resminama çap edilen pursatyndan güýje girýär.
Permany ýerine ýetirmek maksady bilen, döwlet Baştutany guramaçylyk çärelerini geçirmek baradaky Buýruga hem gol çekdi. Resminama goranmak ministrine, içeri işler ministrine, milli howpsuzlyk ministrine, Döwlet serhet gullugynyň başlygyna, Prezidentiň Howpsuzlyk gullugynyň başlygyna we Döwlet migrasiýa gullugynyň başlygyna gönükdirilendir.
Bu edaralaryň ýolbaşçylaryna bellenen möhleti gulluk eden harby gullukçylary harby gullukdan boşatmagy tassyklanan meýilnamalara laýyklykda dabaraly ýagdaýda geçirmek tabşyryldy. Söweşjeň we jemgyýetçilik-ynsanperwerlik taýýarlygynda tapawutlananlary höweslendirmek bellenildi.
