Hytaýly maldar öz bakýan ördeginiň aşgazanyndan takmynan on gram altyn tapdy. Bu barada South China Morning Post neşiri habar berýär.
Waka Hunan welaýatynda ýüze çykýar. Lýu familiýaly kişi öz ördeklerini derýanyň golaýyndaky ozal altyn gazlyp alnan açyk meýdanda bakýan ekeni. Haçan-da ol ördekleriniň birini soýup, ony arassalap başlanda, guşuň aşgazanyndan ownuk sary reňkli daşjagazlary tapýar. Tapyndynyň nämedigini özi anyklap bilmän, ýörite barlaga iberýär.
Hünärmenler bu tapyndynyň hakyky altyndygyny tassyklaýarlar. Altynyň bahasy takmynan 12 müň ýuana, ýagny 1750 dollara golaý diýlip kesgitlenildi.
Ekspertler çaklaýşy ýaly, ördek derýanyň palçygy bilen bilelikde altyn bölejiklerini hem ýuwdan bolmaly. Metalyň aşgazanda dargaýan häsiýeti bolmansoň, adatça guşlara zyýan bermän, tebigy ýol bilen yzyna çykýar. Emma has uly bölekler guşuň içegesinde dykylmalara sebäp bolup bilýär.
Maldaryň kakasy täze ýylyň öňüsyrasyndaky bu täsin tapyndyny geljek gowulygyň we şowlulygyň nyşany diýip hasaplaýar.
