Täze Pokémon Pokopia oýnunyň gazanan üstünligi netijesinde, Nintendo kompaniýasynyň bahasy bir hepdäniň içinde 14 milliard dollar artdy. Bu barada Bloomberg agentligi habar berýär.
Tokio fond biržasyndaky söwdalarda kompaniýanyň paýnamalary soňky bir hepdäniň dowamynda takmynan 18% gymmatlady. Bu görkeziji Nintendo üçin 2026-njy ýyldan bäri iň uly hepdelik ösüş boldy. Söwdalar bir paýnama üçin 10 220 ýapon iýenasy (takmynan 70 dollar) derejesinde tamamlandy.
Pokémon Pokopia oýny 2026-njy ýylyň 5-nji martynda satuwa çykaryldy. Ol diňe Nintendo Switch 2 oýun ulgamynda elýeterlidir. Oýun satuwa çykandan soňky ilkinji dört günüň içinde onuň 2,2 million nusgasy satyldy.
Pokémon Pokopia hakyky durmuşa öýkünip döredilen oýun bolup, onda ulanyjylar pokemonlar bilen bilelikde öz ýaşaýyş nokatlaryny ösdürip bilýärler.
Pokémon franşizasy 1996-njy ýylda Nintendo tarapyndan döredildi we gysga wagtyň içinde dünýäniň iň meşhur oýun tapgyrlarynyň birine öwrüldi. Häzirki wagta çenli Pokémon dünýäsine esaslanýan animasiýa we çeper filmler, şeýle-de dürli harytlar köpçülige hödürlenýär.
