Adidas kompaniýasy Lionel Messi üçin 2026-njy ýylyň dünýä çempionatyna bagyşlanan «F50 Messi 2026 World Cup “El Último Tango”» (Iň soňky tango) butsysyny resmi taýdan tanyşdyrdy. Çünki, öňümizdäki dünýä çempionaty Lionel Messiniň oýun karýerasynda iň soňky dünýä birinjiligi bolup biler.
Butsynyň dizaýny argentinaly ýyldyzyň 2006-njy ýylda özüniň ilkinji dünýä çempionatynda geýen aýakgap modelinden ylham alnyp taýýarlandy. Bu täze önüm F50 hatarynyň bütinleý üýtgeşik görnüşine eýe boldy. Aýakgabyň esasy reňki ak bolup, ol Argentinanyň milli ýygyndysynyň reňklerine we gazanan üstünliklerine yşarat edýän asman-gök gatyşykly elementler hem-de altyn öwüşginli reňkler bilen utgaşdyryldy.
Täze modelde esasy aýratynlyklaryň biri Adidas brendine mahsus bolan üç sany çyzykdyr. Täze modelde bu çyzyklar has agressiw stilde ýerine ýetirilip, butsynyň ýokarky bölegine utgaşyp gidýän penje dyrnaklaryny ýatladýar.
Bu konsepsiýa 2006-njy ýylyň dünýä çempionaty döwrüniň wizual aýratynlyklaryny 2026-njy ýylyň iň döwrebap tehnologiýalary bilen utgaşdyrýar. Işläp taýýarlaýjylar bu modeli F50 hatarynyň geljegine özboluşly bir garaýyş diýip atlandyrýar.
Adidas bu önümi çykarmak bilen bir wagtda Messiniň gatnaşmagynda uly mahabat kampaniýasyna hem başlady. Mahabat wideolarynda meşhur futbolçy 2006-njy ýylyň dünýä çempionatyndaky ilkinji çykyşyny, Argentinanyň milli ýygyndysynyň 2022-nji ýyldaky dünýä çempionlygyny we öňde duran 2026-njy ýylyň uly ýaryşyny ýatladýan kadrlar bilen görkezilýär.
Bu täze aýakgap modeli 2026-njy ýylyň 5-nji iýunyndan başlap resmi taýdan satuwa çykaryldy.
