«Režissýor hem prodýuser Stiwen Spilberg öz filmlerini döretmekde hiç wagt EA tehnologiýalaryna ýüz tutmandyr. Ol bu barada Ostin şäherinde geçirilen «SXSW» maslahatynda mälim etdi» diýip, TechCrunch neşiri habar berýär.
Maslahatda režissýoryň kino önümçiliginde emeli aňyň orny baradaky sowala: «Men öz filmlerimiň hiç birinde emeli aňy ulanmadym» diýip jogap bermegi, zaldaky diňleýjileriň şowhunly el çarpyşmalaryna sebäp boldy.
Şeýle-de bolsa Spilberg, umuman alanyňda, tehnologiýalara garşy däldigini belleýär. Onuň «Aýratyn pikir» («Особое мнение»), «Birinji oýunçy, taýýarlanmaly» («Первому игроку приготовиться») we «Emeli paýhas» («Искусственный разум») ýaly filmlerinde hem tehnologik ösüşiň jemgyýete ýetirýän täsiri hakynda mesele gozgalýar.
Režissýoryň sözlerine görä, ol köp pudaklarda emeli aňyň ulanylmagyny goldaýar, emma döredijilik işinde adamlaryň ornuny maşynlar bilen çalyşmaga taýýar däl. Spilberg öz ssenariýa ýazýan otagynda «noutbuk goýlan boş oturgyjyň ýokdugyny» aýdyp, täze pikirleriň döredilmegine awtomatlaşdyrylan ulgamlaryň gatnaşyp bilmejekdigini ýaňzytdy.
Ýöne Spilbergiň bu garaýşyna seretmezden, emeli aň tehnologiýalary kino önümçiligine barha işjeň ornaşýar. Startaplar býujeti çäkli bolan garaşsyz režissýorlar üçin ýörite gurallary hödürleýärler, iri striming kompaniýalary bolsa şeýle çözgütleri eýýäm öz işlerinde dowamly ulanmaga başladylar.
Muňa mysal edip, Amazon kompaniýasynyň film we serial önümçiligi üçin emeli aň gurallaryny synagdan geçirip başlamagyny, Netflix-iň bolsa, Ben Afflegiň EA arkaly kino düşürmäge niýetlenen kompaniýasyny satyn almagyny aýdyp bolar.
