«Mercedes» toparynyň italýan sürüjisi Andrea Kimi Antonelli «Formula-1» çempionatynyň täze möwsüminiň ikinji tapgyry bolan Hytaý Gran-prisiniň ýeňijisi boldy.
19 ýaşly Antonelli ýaryşlar tapgyrynyň taryhynda iň ýaş ýeňijileriň hataryna girdi. Bu görkeziji boýunça ol diňe 2016-njy ýylda 18 ýaşynda ýeňiş gazanan Maks Werstappenden yza galýar. Şeýle hem italýan sürüjisi kwalifikasiýa ýaryşynda ýeňiş gazanan iň ýaş sürüji bolup, rekord goýdy.
Hytaý Gran-prisinde ikinji orny Antonelliniň «Mercedes-däki» ýoldaşy Jorj Rassell eýeledi. Baýrakly üçlügi dünýäniň ýedi gezekki çempiony Lýuis Hemilton jemledi. Ol «Ferrari» toparynyň düzüminde ilkinji gezek münbere çykdy.
Çempionatyň häzirki ýeňijisi Lando Norris we onuň «McLaren-däki» ýoldaşy Oskar Piastri tehniki näsazlyklar sebäpli ýaryşa gatnaşyp bilmedi.
Ýatlap geçsek, Melburnda geçirilen möwsümiň birinji tapgyrynda hem «Mercedes» topary ilkinji iki orny eýeläpdi, ýöne şonda Rassell ýeňiş gazanyp, Antonelli ikinji bolup pellehana geldi.
