«Film is Fabulous!» haýyr-sahawat guramasy onlarça ýyllap ýitdi hasap edilip ýörlen, Britaniýanyň dünýä meşhur «Doktor Kim» («Доктор Кто») serialynyň iki bölümini hususy kolleksiýalaryň birinden tapdy.
BBC kompaniýasy 16 millimetrlik kinolentadaky asyl ýazgylary eýýäm dikeltdi. «Gorkunç düýşüň başy» («Nightmare Begins») we «Şeýtanyň planetasy» («Devil’s Planet») diýlip atlandyrylýan bu bölümler Pasha baýramçylygy günlerinde BBC iPlayer platformasynda tomaşaçylara hödürlener.
Bu bölümler serialyň 1965–1966-njy ýyllar aralygynda görkezilen «Dalekleriň meýilnamasy» («The Daleks' Master Plan») atly üçünji möwsümine degişlidir. Bu waka serialyň nusgawy döwrüniň iň uly we ähmiýetli taryhy sýužetleriniň biri hasaplanýar. Bölümlerde baş keşbi Wilýam Hartnell janlandyrýar. Ssenariýa bolsa dalekleri (serialyň esasy duşmanlary) döreden fantast ýazyjy Terri Neýşen tarapyndan ýazyldy.
Bu tapyndy serialyň muşdaklaryny hazyna tapana dönderdi. Gynasak-da 1960-njy ýyllarda telekompaniýalara gepleşikleriň ýazgylaryny hemişelik saklamak başartmandyr. Olar sanly arhiwleriň ýokdugy sebäpli, täze gepleşikleri ýazmak üçin köne wideolentalaryň üstünden täzeden ýazgy edipdirler ýa-da ýer boşatmak üçin olary ýok edipdirler. Şonuň netijesinde «Doktor Kim» serialynyň irki döwürlerine degişli onlarça bölüm arhiwlerden ýitip gidipdir.
«Doktor Kim» serialy dünýä medeniýetinde aýratyn orun tutýar. Ol ilkinji gezek 1963-nji ýylda Britaniýanyň telewideniýesinde görkezildi we netijede taryhdaky iň dowamly ylmy-fantastik taslamalaryň birine öwrüldi. Wagtyň içinde syýahat edýän we her gezek gaýta peýda bolanda daş sypatyny-da üýtgeýän Doktoryň keşbiniň döremegine esas bolan pikiriň täsinligi serialyň onlarça ýyla uzamagyna we dowamly täzelenip durmagyna mümkinçilik berdi.
