Amsterdamyň Arza-şikaýat kazyýeti Meta kompaniýasyny öz platformalarynyň we sosial torlarynyň işine wagtynda üýtgetme girizmändigi üçin 10 million ýewro möçberinde jerime çekmäge höküm etdi. Bu karar Ýewropanyň «Sanly hyzmatlar baradaky kanunynyň» talaplaryna esaslanýar.
Kazyýet işi Meta bilen Niderlandlaryň sanly hukuklary goraýjy «Bits of Freedom» guramasynyň arasynda ýüze çykdy. 2025-nji ýylyň oktýabr aýynda Amsterdamyň okrug kazyýeti Facebook-yň we Instagram-yň käbir iş aýratynlyklarynyň Ýewropa Bileleşiginiň kanunçylygyny bozýandygyny anyklap, kompaniýa ilki bilen 5 million ýewro jerime kesipdi.
Esasy nägilelik ulanyjylaryň habarlar lentasynyň sazlamalary bilen baglanyşykly boldy. Kazyýet ulanyjy tarapyndan saýlanan mazmuny görkezmek usulynyň (meselem, täze goýulan materiallaryň yzygiderliligi) hemişelik saklanmandygyny anyklady. Bölümleriň arasynda geçilende ýa-da programma täzeden açylanda, ulgam awtomat usulda ýene-de algoritmleriň maslahat berýän lentasyna dolanyp barýar.
Kazyýet Meta-ny bu kemçilikleri iki hepdäniň içinde düzetmäge borçly etdi. Kompaniýanyň hem öz tarapyndan eden şikaýatyna garamazdan, 2025-nji ýylyň 28-nji oktýabrynda kazyýet talaplarynyň iň giç galanda 31-nji dekabra çenli ýerine ýetirilmegini buýurdy.
Kazyýetiň maglumatlaryna görä, üýtgetmeleriň köpüsi eýýäm girizildi, emma käbir talaplar heniz hem doly ýerine ýetirilmän galýar. Şol sebäpli kazyýet maliýe basyşyny artdyrmak kararyna geldi we jerime möçberini 10 million ýewro çenli galdyrdy.
Meta özüniň başdaky käbir garşylyklaryndan ýüz öwürse-de, başlangyç karar bilen ylalaşmaýandygyny we meseläniň täzeden garalmagyna synanyşjakdygyny bildirýär.
