Şu gün günortanlar Kamçatkada ýerleşýän Şiweluç wulkanyndan deňiz derejesinden 8 kilometr belentlige çenli uzaboýuna kül sütüni pürküldi. Bu barada Russiýanyň Ylymlar akademiýasynyň Uzak Gündogar bölüminiň Wulkanologiýa we seýsmologiýa institutynyň KVERT topary habar berdi.
Hünärmenleriň maglumatlaryna görä, külüň ýaýrawy wulkandan gündogarlygyna 10 kilometr aralyga ýetýär.
Şiweluç wulkany üçin awiasiýa howpunyň «mämişi» kody bellenildi. Bu bolsa wulkanyň atylmagynyň ýerli we halkara uçuşlary üçin howp döredip biljekdigini aňladýar.
Şiweluç Kamçatkanyň iň demirgazygyndaky hereket edýän wulkan hasaplanýar.
Kamçatkanyň iň iri wulkanlarynyň biri bolan bu wulkan 5 müň adam ýaşaýan Klýuçi obasyndan 45 kilometr uzaklykda ýerleşýär. Alymlar Şiweluçyň ýaşynyň 60–70 müň ýyl töweregidigini çaklaýarlar.
