Dust2.us neşiriniň habar bermegine görä, Valve kompaniýasy «Counter-Strike: Global Offensive» (CS:GO) boýunça kiber-sport turnirlerini geçirmäge mundan beýläk rugsatnama bermezlik barada karar kabul etdi. Mundan ozal Valve oýnuň nusgawy görnüşini «Counter-Strike 2-den» aýryp, «CS:GO» üçin ýörite aýratyn identifikator (App ID) döredipdi.
Şunlukda oýunçylar 2012-nji ýylyň asyl şuterini täze oýundan aýratynlykda gaýtadan işletmäge mümkinçilik alypdylar. Bu gaýdyp gelişden soň taslama bolan gyzyklanma ep-esli artdy we käbir pursatlarda bir wagtda oýnaýan ulanyjylaryň sany 66 müňden hem geçdi.
Emma muňa garamazdan, indi bu görnüş boýunça resmi kiber-sport ýaryşlary geçirilmez. Valve kompaniýasy «CS:GO» üçin turnir rugsatnamalarynyň berilmejekdigini tassyklasa-da, beýleki nusgawy taslamalar bolan «Counter-Strike 1.6», «Counter-Strike: Source», «Team Fortress Classic» we «Day of Defeat» boýunça ýaryşlaryň geçirilmegini gadagan edenok.
