Google Play programmalar dükanyndan jemi 19 mln gezek gurnalan 77 zyýanly programma bozuldy. Howpy Zscaler ThreatLabs gözleg toparynyň hünärmenleri ýüze çykardy diýip, BleepingComputer neşiri ýazýar.
Gözlegiň maglumatlaryna görä, ýüze çykarylan programmalaryň 66%-den gowragy mahabat görkezýän programmalardy. Şeýle-de, has howply Joker wirusy köp duşdy – ol programmalaryň dörtden birinde diýen ýaly ýüze çykaryldy. Gurnalandan soň Joker SMS-e elýeterlilik alýar, ekran suratyny alyp bilýär, jaň edip, kontaktlary göçürip, gurluş barada maglumatlary ýygnap we tölegli ýazylyşyklary amala aşyryp bilýär.
Zyýan ýetirijileriň bir bölegi adaty programma ýaly görünýän, ýöne bank maglumatlaryny, SMS we ýerleşýän ýeriň baradaky maglumatlary gizlin ogurlaýan maskware programmalarydy.
Şeýle-de, Harly ady bilen Joker wirusynyň bir görnüşi tapyldy. Adaty Joker-den tapawutlylykda, ol APK-nyň içinde zyýanly kody şifrlenen görnüşde saklaýar, bu hem Google Play-iň barlagyny aldamaga mümkinçilik berýär. Human Security-nyň maglumatlaryna görä, Harly oýunlaryň, fonaryň, oboýlaryň we fotoredaktorlaryň aňyrsynda gizlenýär.
Anatsa wirusynyň soňky wersiýasy zyýanly programmalaryň sanawyny giňeltdi: indi ol 831 bank we kriptowalýuta programmasyna hüjüm edýär. Ony ýaýratmak üçin kezzaplar zyýanly moduly ýükläp, barlagy aldaýan Document Reader – File Manager programmasyny ulandy.
Gizlenmek üçin Anatsa şifrlenen setirleri, ýasama APK-lary we paket atlarynyň üýtgedilmegini ulanýar.
Zscaler-iň gözlegçisi Himanşu Şarma Google Play-de “mahabat zibilli” programmalaryň sanynyň köpelendigini, Facestealer we Coper ýaly zyýan ýetirijileriň sanynyň bolsa azalandygyny belledi.
