Arheologlar Polşanyň günorta-gündogarynda örän gowy saklanan Kaplonosy Koloniýa – orta asyr şäherçesini ýüze çykardylar. Bu taryhy ýadygärlik Wlodawa şäheriniň golaýyndaky gür tokaýlaryň içinde nije asyrlap adam nazaryna ilmän saklanyp galypdyr.
Geçirilen barlaglar toplumyň çäklerinde toprakdan ýasalan goranyş diwarlarynyň, garymlaryň we gadymy binalaryň yzlarynyň bardygyny görkezdi. Şeýle hem arheologlar pyçaklardan, ok uçlaryndan, şaý-seplerden we keramika önümlerinden ybarat köp sanly tapyndylaryň hem üstünden bardylar. Bu taryhy gymmatlyklar X–XIII asyrlarda bu ýerde ýaşan adamlaryň durmuşyny has gowy öwrenmäge ýardam eder.
Alymlaryň bellemegine görä, desganyň şunça wagt geçse-de gowy saklanmagy tebigy şertler bilen baglydyr. Tokaýlyk we batgalyk ýer asyrlar boýy bu şäherçäni zaýalanmakdan we adam-garadan gorap saklapdyr.
Gözlegçiler täze tapyndyny Polşanyň günorta-gündogar arheologiki kartasyndaky «örän üýtgeşik we täsin ýer» diýip atlandyrýarlar. Olaryň çaklaýyşyça, Kaplonosy Koloniýa toplumy irki orta asyrlara degişli bolan harby goranyş desgasydyr.
