Türkmenistanda «Ene mähri» hormatly adyna mynasyp bolan köp çagaly enelere täze ýaşaýyş jaýlarynyň açarlary dabaraly ýagdaýda gowşuryldy. «Watan» habarlar gepleşiginde berlen maglumatlara görä, Halkara zenanlar güni mynasybetli guralan bu dabaralar Aşgabatda we Arkadag şäherinde geçirildi.
Sekiz we şondan köp çagany dünýä indiren hem-de terbiýeläp ýetişdiren eneler täze jaýlaryň eýesi boldy.
Täze gurlan ýaşaýyş jaýlary rahatlygyň ähli talaplaryna doly laýyk gelýär. Öýleriň taslamasynda giň otaglar, döwrebap enjamlaşdyrylan aşhanalar we beýleki zerur otaglar göz öňünde tutulypdyr.
Ýaşaýyş jaýlarynyň döwrebap ülňülere laýyk gelýändigi we milli binagärlik däplerini özünde jemleýändigi bellenilýär. Ýaşaýyş toplumlarynyň howlularynda ähli ýaşdaky adamlar üçin dynç almaga ähli şertler döredilipdir.
Täze öýleriň eýesi bolan zenanlar Türkmenistanyň Halk Maslahatynyň Başlygy Gurbanguly Berdimuhamedowa we ýurduň Prezidenti Serdar Berdimuhamedowa öz çuňňur minnetdarlyklaryny bildirdi.
