Wnedorožnik asfaltdan guma ýa-da daşly ýere düşende tejribeli sürüjiler, adatça, ilki bilen tekerlerdäki basyşy goýberýärler. Bu ulagy çarkandakly ýerlerden sürmegi halaýan sürüjileriň arasynda uzak wagtdan bäri ulanylyp gelýän tejribe: bu tekerleriň ýoluň üsti bilen galtaşýan ýerini artdyrýar, şinalar ýumşaşýar we topraga has gowy “ýapyşmagyny” üpjün edýär. Bu prosedura indi bölekleýin awtomatlaşdyryldy.
Chevrolet kompaniýasy Air Down Mode ulgamy bilen üpjün edilen täzelenen Colorado ZR2 pikap awtoulagy bilen tanyşdyrdy. Bu ulgam awtoulagyň multimediýa ulgamy arkaly şinalaryň basyşyny gözegçilikde saklamaga mümkinçilik berýär. Sürüji islenýän basyş derejesini kesgitleýär, şondan soň elektronika awtoulagy gumaksy, daşlyk ýa-da palçyk ýerlerde sürmäge taýýarlaýar.
Ulag adaty ýol şertlerine gaýdyp gelenden soň, şinalaryň basyşyny elde standart derejä getirmeli.
Pikapyň özi agyr çarkandakly ýerlerde sürmek üçin ýörite döredilen. Onuň uzynlygy takmynan 5,4 metr, ini bolsa 1,94 metr. ZR2 wersiýasynyň asma ulgamy, standart modellere garanyňda, takmynan, 8 santimetr ýokary galdyryldy we ýerden beýikligi tas 27 santimetre ýetýär. Ulagyň ähli tigirli hereketlendiriji, öň we yz taraplary gulplanýan differensiallar bilen üpjün edilen.
Awtoulag 17 dýuýmlyk tekerler, 33 dýuýmlyk Goodyear Wrangler Territory Mud-Terrain wnedorožnik şinalary, aşagy alýumin goragy we güýçlendirilen bosagalar bilen üpjün edilen.
Salonda 11 dýuýmlyk sanly gurallar paneli we Google hyzmatlary bolan 11,3 dýuýmlyk multimediýa ekrany bar.
Kapotyň aşagynda 314 at güýjüni we 583 Hm çekijiligi öndürýän 2,7 litrlik turbirlenen TurboMax hereketlendirijisi ýerleşýär. Ol sekiz tizlikli awtomatiki geçiriji bilen birleşdirilen. Pikap 6700 funta çenli ýükli tirkegi çekip bilýär.
Ýewropada Chevrolet Colorado ZR2-niň bahasy takmynan 88 müň ýewrodan başlaýar.
